30 vjeçari, që vdiq dje në Pakashticë të Podujevës, dyshohet se u plagos nga baxhanaku i tij nga pakujdesia derisa kishin dalë për gjueti.

Kjo u konfirmua nga policia dhe prokuroria, derisa nga kjo e fundit kanë bërë të ditur se i dyshuari nuk kishte leje për armën, dhe i njëjti është ndaluar si i dyshuar për dy vepra penale.

“Lidhur me këtë rast ju njoftojmë se, me urdhër te prokurores nga Departamenti i Krimeve të Rënda, është ndaluar një person i dyshuar për veprat penale “Vrasja nga pakujdesia” dhe “Mbajtja në pronësi, kontroll ose posedim të paautorizuar të armëve”. Me urdhër të prokurores së çështjes, viktima është dërguar për obduksion, derisa janë duke u ndërmarrë edhe veprime të tjera hetimore me qëllim të sqarimit të plotë të rrethanave të rastit në fjalë”, ka thënë zëdhënësja e kësaj prokurorie Laureta Ulaj.

Në ndërkohë, edhe policia në raportin 24 orësh të policisë ka dhënë më shumë detaje lidhur me rastin.

“Është arrestuar i dyshuari mashkull kosovar, pasi që gjatë gjuetisë dyshohet se nga pakujdesia ka qëlluar me armë zjarri viktimën mashkull kosovar. Vdekjen e viktimës e ka konstatuar mjeku kujdestar. Në vendin e ngjarjes kanë dalë njësitet relevante policore, prokurori i shtetit si dhe për shkak të terrenit të papërshtatshëm, kanë asistuar edhe FSK-ja për tërheqjen e trupit të pajetë”.

Viktima nga fshati Dumnicë është 30-vjeçari me inicialet M.K., ndërsa i dyshuari është 34-vjeçari me inicialet F.B.