Presidenti i Serbisë, Aleksandar Vuçiq, ka thënë se të premten ka thirrur mbledhje urgjente të Këshillit të Sigurimit në Beograd.

Arsye për këtë është aplikimi i Kosovës për t’u bërë anëtare e Këshillit të Evropës.

“Dua të ju njoftoj se para pesë minutash Donika Gërvalla , ka dorëzuar zyrtarisht kërkesën që e ashtuquajtura Kosovë e jo siç e quajtët ju Kosova, të anëtarësohet në Këshillin e Evropës. Mbetet te ne që mos të hyjmë në urrejtje dhe në psikozën e konflikteve .Por do ti përgjigjemi Prishtinës, në mënyrë të përgjegjshme e serioze. Në pajtim me këtë nesër pra të premten unë kam thirrur takimin urgjent mbledhjen e Këshillin për Siguri Kombëtare të Serbisë”, tha Vuçiq.

Kryetari i Serbisë, tha se me këtë veprim pala kosovare shkeli brutalisht Marrëveshjen e Uashingtonit, njofton Klan Kosova.

Më 4 shtator 2020, Kosova e Serbia nënshkruan ujdi zotimesh. Njëra prej pikave ishte Moratoriumi që vlente një vit. Beogradi ndali fushatën e çnjohjeve e Prishtina aplikimin për hyrje në organizata ndërkombëtare.

Ai paralajmëroi  fushatë për t’i hequr  Kosovës njohjet ndërkombëtare, kryetari i Serbisë akuzoi shtetet e fuqishme botërore se po ofrojnë përkrahje pa rezervë.

“Ata janë shumë më të fortë nuk mendoj këtu në Prishtinën  por në mentorët e tyre. Ata të cilët i lindën, që i kanë përkundur në djep, dhe të cilët u  ofrojnë mbështetje të pa rezervë, përkundër asaj sa jo serioz janë pala tjetër e që nuk po bëjnë asgjë për gjetjen e një kompromisi”, tha ai.

Serbia është anëtare e Këshillit të Evropës, prej prillit 2003.