Kryeparlamentari i Republikës së Kosovës, Glauk Konjufca ka mbajtur konferencë me homologun e tij nga Maqedonia e Veriut, Talat Xhaferin.

Xhaferi në konferencën për shtyp theksoi se mbështesin anëtarësimin e Kosovës në të gjitha organizatat ndërkombëtare.

“Kemi marrëdhënie të shkëlqyera bilaterale të cilat karakterizohen me mbështetje dhe me respekt të ndërsjelle, dialog të hapur dhe konstruktiv”, u shpreh Xhaferi.

“Me kuvendin e Republikës së Kosovës bashkëpunojmë edhe në nivel të grupeve parlamentare të bashkëpunimit por edhe në asambletë parlamentare ndërkombëtare, mbi të gjitha në Asamblenë Parlamentare të procesit të bashkëpunimit të Evropës Juglindore”.

“Në raport me politikën e jashtme si vende kemi përcaktime dhe qëllime të përbashkëta strategjike, siç e dini tanimë jemi anëtare e plotfuqishme e aleancës së NATO-s dhe mbështesim aspiratat euroatlantike të Kosovës, duke qenë në dispozicion të ndajmë me ju njohurit dhe përvojat e fituara nga rrugëtimi jonë si për këtë aleancë edhe për Bashkimin Evropian, siç e dini kemi një histori shumë vjeçare por përsëri hasim në pengesa të ndryshme”, shtoi ai.

Tutje, ai ka thënë se së bashku me Konjufcen kanë konstatuar se anëtarësimin në këto dy organizata do të thotë stabilizim dhe prosperitet për rajonin

“Me kryetarin Konjufca bashkë konstatuam se anëtarësimin në këto dy organizata do të thotë stabilizim dhe prosperitet për rajonin. Ne si Republika e Maqedonisë së Veriut kemi qëndrim afirmativ ndaj aderimit të Republikës së Kosovës në të gjithë nismat dhe forumet multilaterale dhe rajonale, dhe do të vazhdojmë edhe më tej me mbështetje anëtarësimin e Kosovës në të gjitha organizatat dhe nismat ndërkombëtare ku jemi anëtar me fuqi votues”.

Në fund Xhaferi foli edhe për dialogun Prishtinë-Beograd.

“Në lidhje me dialogun Prishtinë-Beograd qëndrimi ynë është mbështetje e plotë deri në arritjen e një marrëveshje përfundimtare e pranueshme për të dyja palët, marrëveshje me të cilën do të garantohet paqja stabiliteti dhe siguria dhe përparimi i dy vendeve”.